🐫 Izay rehetra ilaina !

Manantena aho fa ity lohahevitra ity dia manentana anao ary mamporisika anao bebe kokoa ho sahy hivoaka ny sambo ary hanao ny dingana rehetra amin’ny finoana izay asain’Andriamanitra ataonao amin’ny Krismasy 😉

Any amin’ny firenena maro izay mampihatra ny kolontsaina espaniola dia tsy mankalaza an’i Dadabe Noely fa mankalaza ny fahatongavan’ireo Magy izay tonga hitondra fanomezana ho an’ny ankizy =)

Tsy dia manazava firy momba ireo olon-kendry tonga nitsidika an’i Jesosy fony Izy vao teraka ny Baiboly. Anio dia tiako handinika izany isika amin’ny fomba fijerin’i Josefa sy i Maria, izay ivon’ny fizotry ny finoana izay niantsoan’Andriamanitra azy ireo.

Mbola tao Betlehema izy ireo taorian’ny nahaterahan’i Jesosy. Ary na dia efa kely aza ny vatsy teo am-pelatanan’izy ireo, dia tsy mbola azony antoka izay ho dingana manaraka ho hataon’izy ireo.

Indray andro, rehefa teo am-piandrasana izy ireo dia indro nisy nandondòna teo am-baravarana… Vahiny no tonga tao, angamba avy any atsinanana, avy any amin’ny faritr’i Persia. Feno tsiky izy ireo, satria nahita izay notadiaviny nandritra ny herinandro maromaro: ny Mpanjakan’ny Jiosy.

Hoy ny Baiboly: «Ary rehefa tafiditra tao an-trano izy, dia nahita ny Zazakely sy Maria reniny ka niankohoka teo anatrehany; ary nony efa nosokafany ny fitehirizan-drakiny, dia nanolotra zavatra ho Azy izy, dia volamena sy zava-manitra ary miora.» (Matio 2:11).

Alaivo sary an-tsaina izay mety ho tsapan’i Josefa sy i Maria tamin’io fotoana io:

• Notarihin’Andriamanitra ho any amin’i Jesosy ireo olona ireo, izay azo inoana fa nipetraka any an-jatony kilaometatra lavitra.
• Nandefa kintana manokana ny Ray hitarika azy telo hatreo am- bavahady nisy azy ireo (mety anjely no nirahina hitarika azy ireo).
• Ireo olona ireo dia niankohoka teo amin’ny Zaza ary nanambarany hoe Mpanjakan’ny Jiosy, ka nanamafy izay rehetra ninoan’i Josefa sy Maria.
• Fanampin’izany, ireo olon-kendry ireo dia nanome azy ireo zava-tsarobidy ara-paminaniana, izay tamin’izany fotoana izany, dia nivadika ho vatsin’i Josefa sy Maria.

Azoko sary an-tsaina i Josefa sy i Maria nitsambikin’ny hafaliana manoloana izany zava-nitranga izany. Tsy mahagaga raha milaza ny Baiboly fa “nitahiry izany rehetra izany tao am-pony” i Maria! Tena mahatalanjona ny zavatra ataon’Andriamanitra!

Eny, ry namako, hain’Andriamanitra ny manome izay ilainao, manentana anao, mankahery anao ary mampahery anao amin’ny iraka izay omeny anao! Ary noho izany, raha tsy maintsy mitondra olona avy lavitra be aza Izy hanataterahan’ izany, dia ho ataony tokoa izany 😉