🐘Mahery noho ny eritreretinao ianao !

Oviana ianao no nahita « cirque » farany? Ilay toerana feno bibidia efa nampiofanina sy olona maro manana fahaiza-manao mahavariana.
Indray mandeha aho dia naheno fa tao amin’ny cirque iray dia nanana fahazarana mamatotra ny elefantany tamin’ny rojo vy sy hazo kely izy ireo mba tsy handosirany. Ny zavatra azo antoka dia raha ny tanjaky ny elefanta dia vitany ny manapaka ilay rojo sy hazo kely amin’ny fihetsika kely fotsiny. Tsy nanao izany mihitsy anefa izy, ary nisy antony izany. Raha nanontaniana ireo mpanazatra azy dia izao no fanazavana azo : fony mbola kely ilay elefanta dia nofatorana rojo tamin’ny andrin-jiro izy amin’ny alina mba tsy ho afa-mandositra. Mbola niezaka nanafaka ny tenany ihany ilay elefanta kely, saingy rehefa nandeha ny andro, hitany fa tsy vitany ny nanapaka ny rojo, dia nanaiky ihany izy fa tsy misy azony atao. Izany no nahatonga azy tsy hiady intsony. Ary amin’izao fotoana izao, na dia biby goavam-be aza izy, nomena hery tsy manam-paharoa, dia mijanona mifikitra mafy amin’io hazo kely io foana izy.
Ry namako, matetika isika dia mahatsiaro voageja rojo izay heverintsika fa tsy mety ho tapaka intsony amin’ny fiainantsika. Saingy manana vaovao tsara ho anao aho anio : miaraka aminao ny Tompo ary ny Baiboly dia milaza fa « izay itoeran’ny Fanahin’ny Tompo no itoeran’ny fahafahana » (II Korintiana 3 :17) Te hanome anao fahafahana tanteraka Andriamanitra !
Ry namako, mahery noho ny eritreritrao ianao. Mahery ianao, amin’ny alalan’ny Fanahy Masina, handrava ny lainga napetraky ny fahavalo teo amin’ny fiainanao nandritry ny taona maro. Azonao tapahina ihany koa ny rojo vy izay nihazona anao ho babo hatry ny ela. Hiara-hivavaka isika : « Tompo ô, ampio aho hahita ny zava-drehetra amin’ny masonao, mba hahafahako manafaka ny tenako amin’ireo gadra rehetra mbola eo amin’ny fiainako. Tariho isan’andro aho mba hahafahako manafoana ireo lainga nambolen’ny fahavalo an-kolaka ato anatiko, ary mba hifaliako bebe kokoa hatrany amin’ny fahafahana efa nomaninao ho ahy, ry Andriamanitro o. Misaotra ny amin’ny zavatra ataonao amin’ny fiainako! Amin’ny anaran’i Jesosy. Amen !
Anio, ankafizo tanteraka ny fahafahana nomeny.