🏃Nanao fanatanjahan-tena ve ianao androany ?

Manao fanatanjahan-tena ve ianao ao an-trano ? Nandritra ny fotoana fihibohana dia olona maro no hita nanao fanatanjahan-tena tao amin’ny trano fonenany.
Izaho manokana dia efa an-taonany maro izao no manao izany ato an-trano. Tiako ny manao fanatanjahan-tena ato an-trano satria hahafahako mifantoka sy mieritreritra rehefa mihetsika ny vatako. Ohatra ny omaly izao , sady mihaino hira fiderana aho no mikotrana. Misaina ireo asa sarobidy izay hataon’Andriamanitra sy izay mbola ho hataony eo amin’ny fiainako aho mandritry izany fotoana izany. Azoko sary an-tsaina fa olona an’arivony no novain’Andriamanitra, fiangonana maro no nitsangana, kristianina maro no nahazo hery sy voavoatra… Faly loatra aho ka nanomboka nandihy sy nihikam-pifaliana no sady nisaotra an’Andriamanitra mafy ny amin’izay mbola ho tanterahiny !
Tian’Andriamanitra ny fiderana toy izany. Raha ny marina, rehefa niditra tao Jerosalema i Jesosy, dia voalaza fa maro ny olona no « naka sampan-drofia ka nivoaka hitsena Azy sady niantso hoe: Hosana! Isaorana anie ny Mpanjakan’ny Isiraely, Ilay avy amin’ny anaran’i Jehovah » (Jaona 12 :13). Fotoana feno voninahitra izany ! Nihoby sy nidera an’Andriamanitra tamin-kafaliana ny vahoaka no sady nitondra sampan-drofia napetraka teo an-tongotr’i Jesosy, toy ny natao tamin’izany andro izany, mba hanomezam-boninahitra ny mpanjaka. Fotoana lehibe tokoa izany ary rehefa niezaka niampanga an’ i Jesosy ny Fariseo satria tsy voafehy ny vahoaka dia hoy Izy namaly azy ireo : « Lazaiko aminareo fa raha mangina ireo, dia ny vato no hiantsoantso. » (Lioka 19 :40)
Ry namako, aza avela ny vato no hiantsoantso an’Andriamanitra anio ! Fa amin’ny fontsika manontolo no aoka hanandratantsika vavaka feno fiderana sy fifaliana. Andeha isika hibanjina ilay Mpanjakan’ny mpanjaka sy ny Tompon’ny tompo, Ilay namonjy antsika sy miasa mahery eo amin’ny fiainantsika.
Tonga amin’ny famaranana ny lohahevitra mikasika ny fomba famoahana ny herin’ny vavaka isika. Antenaiko fa nitondra fitahiana lehibe ho anao izany !
Ato am-poko manokana ianao.