🎥 Areheto ny Jiro, “caméra”, … Alefa !

Andriamanitra dia Andriamanitry ny asa. Tiany ny miresaka amintsika ao amin’ny ati-lalin’ny fontsika, ny mamporisika antsika hitsahatra eo amin’ny Fanatrehany ka hatoky Azy. Eo andanin’izay dia mankahery antsika lalandava Izy mba hanetsika ny finoantsika sy handray fanapahan-kevitra mampandroso hatrany. 

Mihevitra ho mahalala zava-boajanahary sy zava-panahy maro isika, saingy rehefa ampiharintsika izy ireny vao tena fantatsika marina. Nanao izany fahadisoana izany in’arivony aho teo amin’ny fiainako, isan’izany ny fotoana nijereko andiany 4 tamin’ny Masterchef (fifaninanana iray momba ny sakafo nandeha tamin’ny fahitalavitra). Nieritreritra aho hoe nanampy ahy tamin’ny fianarana nahandro ny zavatra hitako, saingy tsy izany mihitsy no izy. Rehefa nikasa ny hahandro aho, dia tonga saina fa tsy nahay. Raha ny marina dia na ny fanapahana tongolo aza nojereko tamin’ny Youtube ! =) Tsy nisy nilako ireo fahalalana akory satria tsy ampy fampiharana aho. 

Ry namako, anio ny andro andraisana andraikitra. Raha mahatsiaro ketraka noho ny henatra ianao, raha mihevitra ho nanota loatra na koa saro-kenatra loatra ny milaza ny hevitrao, dia ‘ndao anio hiatrika ireo olana ireo ka hanomboka hanova ny fiainanao.

Hoy ny Baiboly : « Koa hatanjaho ny tànana miraviravy sy ny lohalika malemy; ary manaova làla-mahitsy halehan’ny tongotrareo, mba tsy hampipitsoka ny tongotry ny mandringa, fa ny mba hahasitrana azy kosa » (Hebreo 12 :12-13).

Andriamanitra dia tena mitady fahombiazana ary tiany ho toy izany koa ianao. Anio, mitsangàna ary ahitsio izay tsy tomombana tamin’ny fiainanao. Ho hitanao eo ny fahagagana ataon’Andriamanitra eo amin’ny fiainanao !

Ario eo an-tongony ny henatra rehetra, ny fiampangana rehetra sy ny fanamelohana rehetra, ary aoka ho feno ny Fiadanany sy ny Fitahiany ianao.

Manoatra noho ny mpandresy ianao ao amin’i Kritsy.