🌿 🍽 Ilay singa tsiambaratelo !

Manana singa tianao manokana (na tena tsiambaratelo mihitsy) ve ianao rehefa mahandro ? Ho ahy manokana dia ny kotomila izay. Fony aho nipetraka tany Texas dia hitako tamina sakafo meksikana io singa io ary tena tiako ny tsirony. Hany ka nanomboka teo dia miezaka manisy azy aho amin’ny nahandroko =)

Ankafiziko ny kotomila saingy tsy hevitra tsara foana ny mampiasa azy. Ohatra hoe tsy hieritreritra ny hanisy azy amina sakafo mamy toy ny ronono sôkôlà mihitsy aho. Azonao an-tsaina ve ny tsiron’izany ? 😵‍💫 Ah ! 

Ary ny zavatra mahafinaritra dia ny hoe Andriamanitra dia manana singa miafina izay azonao ampiasaina amin’ny fotoana rehetra. Te-hahalala io singa io ve ianao ? Ny fitiavan’Andriamanitra izany. Io fitiavana tena marina izay avy amin’ny fon’Andriamanitra io no singa manan-danja, manana hery hanova ny fifandraisana sy ny toe-javatra ary ny zavatra ataonao rehetra ho lasa fotoana miavaka.

Toetran’Andriamanitra mihitsy ny fitiavana (I Jaona 4:8). Arakaraka ny mahafeno anao amin’io fitiavana io no hahatsapanao bebe kokoa an’Andriamanitra, ary arakaraka ny maha-akaiky anao kokoa amin’Andriamanitra  no hisehoan’ny Fitiavany amin’izay rehetra ataonao.

Hoy ny Baiboly : « Ary mandehana amin’ny fitiavana, toy ny nitiavan’i Kristy anareo, dia ny nanolorany ny tenany ho fanatitra sy ho fanavotana amin’Andriamanitra, ho hanitra ankasitrahana. » (Efesiana 5:2).

Ry namako, manana tombony afaka mandeha amin’ny fitiavana toy ny nataon’i Jesosy ianao. Avelao ny fitiavan’Andriamanitra hanenika izay rehetra iainanao, izay fihaonana sy izay resaka ary izay rehetra ataonao anio… ary avelao izany hitondra ny hanitry ny Lanitra eo amin’ny fiainanao. Manome toky anao aho fa raha hanandrana izany isan’andro ianao, dia tsy te hiala miny intsony !

Mandrosoa amin’ny fo feno fitiavana mankany amin’ny tanjona, ary avelao ny Hanitra sarobidy entiny hanondraka ny fiainanao.