✋🏻 Aza manaiky ho voampanga!
Efa nilalao ny “Chass’Taupes” ? ve ianao? Kilalao natao ho an’ny ankizy izy ity, ao anatin’izany dia tsy maintsy mikapoka ny lohan’ilay sary olona kely mahafatifaty eo ianao rehefa mivoaka iny ny lohany, miaraka amin’ny “marteau” manokana. Tena mahatsikaiky!
Indraindray isika dia manana fomba fijery an’Andriamanitra tahaka ny amin’ity lalao ity, izay tsy zavatra tsara.
Eny tokoa, indraindray isika dia mahita an’Andriamanitra ho toy ny miandry antsika fotsiny, amin’ny hazo, mba hanao fahadisoana isika ary mba hamelezany sy hanafaizany antsika.
Ary noho izany, dia mety ho latsaka ao anatin’ny fandrika isika ka mieritreritra fa izay miseho eo amin’ny fiainantsika dia toy ny “famaizana” izay ampiharin’Andriamanitra amintsika noho ny fahotana vitantsika. Io fomba fisainana io dia mitondra antsika ho ao amin’ny fiampangana sy fanamelohana.
Kanefa, ry namako, tsy misy ifandraisany amin’ny zava-misy anefa izany! Jereo izay lazain’ny Baiboly hoe: “Iza no hiampanga ny olom-boafidin’Andriamanitra? Andriamanitra no manamarina azy. Iza no manameloka? Kristy Jesosy no efa maty, eny, sady nitsangana tamin’ny maty koa ka mitoetra eo amin’ny tĂ nana ankavanan’Andriamanitra ary mifona ho antsika.” ( Romana 8:33-34).
Eny Ry namako, Andriamanitra dia:
- Tsy manome tsiny anao, fa manamarina anao !
- Tsy manameloka anao Izy. Noraisin’i Jesosy ho Azy ny fanamelohana anao, mba ho afaka ianao!
- Mifona ho anao!
Ry namako, mijoro eto Andriamanitra ho anao! Tsy miampanga anao na manameloka anao Izy, fa mifona ho anao. Te hitahy anao amin’ny lafiny rehetra amin’ny fiainanao Izy.
Jesosy dia nanafaka anao tamin’ny fiampangana sy fanamelohana. Ary raha miady ho anao Izy, iza no afaka hiampanga anao? Iza no afaka manameloka anao?
Ao anatin’ny andro vitsivitsy amin’ity herinandro ity dia hojerentsika ny fomba hanoherana amim-pahombiazana ny eritreritry ny fiampangana izay miditra eo amin’ny fiainantsika. Ary indrindra amin’ny alalan’ireto loharano telo ireto : ny fahavalo, ny hafa ary ny eritreritsika manokana.
Mahereza! Mitondra anao ao am-poko aho,
