☀️ Anio dia afaka MISY fotsiny ianao!
Hatramin’izay nanoratako ny Fahagagana Isan’andro, dia niova ny fiainako ary nihamafy tokoa. Mahatsiaro ho voaara-maso hatrany aho, ankasitrahana nefa voatsikera koa!
Amin’ny ankapobeny dia tsy mampaninona ahy ireo eritreritra ireo, fa isaky ny mahatsiaro ho malemy aho dia lasa vao mainka mahatsapa izany. Kanefa, ny olona malemy dia tsy mahafehy ny fihetseham-pony.
Soa ihany fa ilay Andriamanitra mahery dia mikarakara ireo malemy mandrakariva!
Hatramin’ny nanombohan’ity asa ity dia nifandray tamin’ny mpanolotsaina mahafinaritra iray aho.
Notantarainy tamiko fa, raha niara-nandeha tamin-drainy izy, dia nisy niantso azy hoe : “Ianao…”! Ny rainy, izay nanome voninahitra sy nirehareha ny amin’ny zanany, no saika hanohy ny resaka, kanefa nanakana azy izy: “Dada a, rehefa mody any an-trano aho, dia te ho zanakao vavy fotsiny!”
Endrey sary mahafinaritra! Nandray lesona tsara ho an’ny tenako aho, ary nampitaiko avy hatrany tamin’ny fianakaviako izany. Izaho ihany koa dia mila toerana iray mba hahafahako mijanona ho “zanakavavin’ny ray aman-dreniko” fotsiny. Saika hilaza mihitsy aho hoe: toerana iray izay izaho “irery” no zanakavavin’ny ray aman-dreniko. Aza hadinoina fa ny maha-zanak’Andriamanitra dia mihoatra noho ny ampy! Zanak’Andriamanitra ianao:
“Fa hianareo rehetra dia zanak’Andriamanitra amin’ny finoana an’i Kristy Jesosy!” (Galatiana 3.26)
Ary fantatrao ve ny tian’i Jesosy ho an’ny zanany, sy ho anao,?
Hoy i Jesosy: “Avelao ny zaza, ary aza rarana tsy hanatona Ahy; fa an’ny toa azy ny fanjakan’ny lanitra. Ary nony nametraka ny tànany taminy Izy, dia niala teo.” (Matio, 19.14-15).
Tsy nanao na inona na inona mba ho mendrika ny fitiavan’Andriamanitra ireo zaza ireo. Toy izany koa ianao. Tsy mila mampiseho Aminy fa matanjaka ianao, na manaporofo amin’ny alalan’ny asanao fa manampy ny rehetra ianao ary tena manao ny ainao tsy ho zavatra . Tsia, tiany ianao araka izao maha ianao anao izao. Anio afaka ny ho “zanaka” tsotra fotsiny ianao, ZANAK’ANDRIAMANITRA!
Angamba tonga izao ny fotoana hitenenanao hoe: “Miala tsiny fa tsy anio, mitsidika ny raiko aho, ary eto aho satria te ho “zanany”, ary indrindra “zanak’Andriamanitra” .
