😃 Tsia, tsy izao no farany !

“Eny, tsy ho tafavoaka amin’izao olana mianjady amiko izao mihitsy aho ! Tsy ho vitako ny hahatratra ny tanjona rehetra miandry ahy !” 

Raha toa ka manelingelina ny sainao ny eritreritra toy izany amin’izao fotoana izao, dia tsy maintsy hilaza izao zavatra izao aminao aho : “Marina tokoa izany  ry namako ! Izany no antony amporisiako anao hijery ny zava-misy amin’ny mason’Andriamanitra.

Rehefa voahodidin’ny miaramilan’ny mpanjaka i Elisa tamin’ny misasak’alina, dia nihazakazaka nankeo aminy ny mpanompony tamin’ny famoizam-po nanao hoe: “Indrisy, tompoko! Ahoana no hataontsika?”  (2 Mpanjaka 6.15). Fantatrao ve ny fihetsik’i Elisa manoloana izany ? 

Nanome toky azy izy hoe: “Aza matahotra; fa ny momba antsika dia be noho ny momba azy.” (2 Mpanjaka 6.16). Azoko antoka fa avy hatrany ilay mpanompo dia namaly azy hoe : “Tsy hitako anefa izany ?!”

“Ary Elisa nivavaka hoe: Jehovah ô, mifona aminao aho, ampahirato ny masony mba hahitany. Ary Jehovah nampahiratra ny mason’ilay zatovo; ary dia nahita izy, ka, indro, ny tendrombohitra feno soavaly sy kalesy afo manodidina an’i Elisa.” (2 Mpanjaka 6.17).

“Na dia tsy hitan’ ny masonao aza dia fantaro fa Andriamanitra dia miady ho anao foana.” Ny mahasoa anao no  tadiaviny !

Ry namako, lasa mihasarotra ny fiainana ka indraindray isika manjary rendrika anaty  fahasahiranana isan-karazany, amin’ny asa maro tsy misy fitsaharana, amin’ny olana ara- pifandrasaina izay tsy haintsika intsony ny fomba hitondrana azy. Mety hiatrika olana miantraika amin’ny ny tenanao mihitsy aza ianao, izay mitondra anao amin’ny safidy mamotika ny fahasalamanao sy ny vatanao.

Angataho Andriamanitra hampahiratra ny masonao mba ho hitanao tsara fa ambonin’io olanao io dia misy Andriamanitra mahery, tsy takatry ny saina ny fahalehibiazany, ary azo hitokiana indrindra.

Eny, eo anatrehan’ny zava-drehetra mampahory anao isan’andro, dia misy tafika lehiben’ny fahendren’Andriamanitra, vahaolana ary valimbavaka izay miandry anao ! 

Mivavaka aho mba hampahiratin’Andriamanitra ny masonao, tahaka ny nampahiratany ny mason’ny mpanompon’i Elisa ! Ry namako, ny zavatra rehetra ilainao dia hainy atao, raha mitodika Aminy ianao.

Avelao izay mampahory anao, raiso ny Fahendreny : ilay avy any amin’Ilay Andriamanitra Tsitoha !