😉 Ilay Tena izy !

Mahagaga ny fifaliana tsapan’i Davida mikasika ny zava-drehetra momba an’Andriamanitra. Na tao anatin’ny fotoan-tsarotra aza izy, dia nifikitra tamin’Andriamanitra tamin’ny heriny rehetra, araka ny hitantsika miverimberina ao amin’ny Salamo. 

Mpanjaka i Davida, nefa tsy nisalasala nanokatra ny fony sy nampiseho ny tena maha izy azy teo imason’ny hafa. Anisan’ny ohatra tsara indrindra tamin’izany ny fahatongavan’ny fiaran’Andriamanitra tao Jerosalema. 

Hoy ny Baiboly : “…Dia nandeha Davida ka nampakatra ny fiaran’Andriamanitra… tamin’ny fifaliana. […] Nandihy tamin’ny heriny rehetra teo anatrehan’ny Tompo i Davida. […] Davida sy ny taranak’ Isiraely rehetra nampakatra ny fiaran’i Jehovah tamin’ny hoby sy ny feon’anjomara.” (2 Samoela 6:12-15).

Azonao sary an-tsaina ve izany ? Mpanjaka mifaly sy mandihy toy ny zaza eo anatrehan’ny olona rehetra. Tsy sary mahazatra izany, kanefa … tena i Davida tokoa ! Mpanjaka be herim-po, nahery tamin’ny ady sady be voninahitra, nefa tsy natahotra nampiseho ny tena maha izy azy, na nanatanteraka zavatra tsy mbola nisy nanao hatramin’izay. 

Ny tsy fahatahorany ny hevitry ny hafa, mbamin’ny fitiavany an’Andriamanitra sy ny herim-pony, dia nisintona ny fitahian’Andriamanitra teo amin’ny fiainany ! Ary izany no nahatonga azy ho mpanjaka tian’ny olona indrindra teo amin’ny tantaran’ny Isiraely. 

Raha ny marina, ny faniriany hitondra ny fiaran’Andriamanitra dia nanome antoka fa ho feno fifaliana sy fanajana an’Andriamanitra ihany koa ny olona rehetra. 

Ry namako, Andriamanitra dia miantso anao ho marina sy tsy hatahotra izay lazain’ny hafa na eritreretin’ny hafa. Te hamporisika anao aho anio mba hanao izay rehetra asain’Andriamanitra ataonao, ary hanaisotra ny fisehoana ivelany na ny tahotra ny “izay holazain’ny olona” eo amin’ny fiainanao. Aza matahotra ny hijoro amin’ny maha izy anao, ary avelao ny fitiavanao an’Andriamanitra hiditra ao am-ponao sy hitarika ny dianao rehetra.