🏴‍☠️ Ilay tetik’ady lehibe…

Araky ny hevitrao dia nahoana ny fahavalo no mifofotra haka fanahy antsika ? Inona no tombontsoany amin’izany ?

Raha maniry ahatakatra izany isika dia mila fantatsika fa misy tontolo ara-panahy izay manana tetik’ady ratsy hanakana ny Fanjakan’ny Lanitra tsy hihitatra eto an-tany. Satria rehefa tsy mihitatra ny Fanjakan’ny lanitra eto an-tany dia hanam-potoana ny aizina haka fanahy ary hanjaka eto.

Ezahin’ny fahavalo amin’ny fomba rehetra ny hanakanana anao tsy hahita ny herinao ao amin’i Kristy sy ny mety fam irapiratanao amin’ny Hazavany. Mampiasa karazana lainga sy teny mahataona izy handentehana anao anaty ota, ka tsy hanatanterahanao ny anjara voatendry efa nomanin’Andriamanitra ho anao.

Jereo ny lazain’ny Baiboly mikasika ireo fakam-panahy natrehin’i Jesosy tany an-tany hay : “Ary rehefa nahatapitra izay fakam-panahy rehetra ny devoly, dia nandao Azy izy aloha. Ary Jesosy niverina tamin’ny herin’ny Fanahy nankany Galilia; dia niely tamin’ny tany rehetra manodidina ny lazany..” (Lioka 3:13-14)

Voamarikao ve hoe inona ny vokatry ny fanoheran’i Jesosy ny fakam-panahy ? Feno ny herin’ny Fanahy Masina ny fiainany, ary nanomboka nampiely ny Fanjakan’ny Lanitra teo amin’ny manodidina Azy. Ny aizina dia nanana tanjona manokana dia ny hoe : ho lavo amin’ny ota Jesosy ka tsy ahatanteraka ny asam-pamonjeny.

Rehefa tratry ny fakam-panahy ianao dia ezahin’ny fahavalo inoanao fa tsy misy akony goavana ny nataonao, tsy ho voakasika ny ara-panahinao ary zavatra kely mandalo ireny ka tsy ilaina asiana tombam-bidy. Aza mino izany lainga izany ! Mifanohitra amin’izany satria : ezahiny hilentika anaty karazana ota sy fanamelohana ianao ka tsy hiaina ny herin’Andriamanitra ary tsy hahatanteraka ny anjara voatendrinao.

Izany mihitsy no niainako nandritry ny taona maro naha-voafatotra ahy tamin’ny fakam-panahy maro : nanakana ahy tamin’ny fifandraisako tamin’Andriamanitra ireo ota ireo. Ary rehefa nohafahana aho dia afaka ny nanavaka ny aizina izay niafina tao ambadik’izany ary ireo ezaka maro nataon’ny fahavalo hamitaka sy hamatotra ahy.

Ry namako, tsy misy fakam-panahy tsy manan-tsiny izany :  tanjona iray daholo ny antony dia ny hamono sy handringana anao.

Anio, mangataha amin’ny Tompo ny hampahitany anao mazava ireo fakam-panahinao ary ataovy lisitra izany. Hiasantsika izany lisitra izany ato anatin’ny andro manaraka. Fa mandra-pahatonga izany dia afaka mivavaka amin’ny Tompo ianao mba hanafahany anao amin’ny otanao. 

Sarobidy loatra amin’Andriamanitra ianao !