😎Saina milamina sy tony !

Ny faharetana dia iray amin’ireo toetra lehibe indrindra ananan’Andriamanitra. Tena manam-paharetana amintsika tokoa Izy ! Izy no Ilay Ray tsara indrindra. Manam-paharetana amintsika Izy rehefa mivily lalana isika ka lavo mandritra ny diantsika, na koa rehefa mandray fanapahan-kevi-diso.

Tena tiako ny fomba namalian’i Jesosy an’i Marta. Mety nahatsiaro ho voatafika Izy. Toa nanome tsiny Azy mantsy I Marta sady nilaza Taminy izay tokony nataony. 

Azon’I Jesosy natao ny nanome valinteny maina sy feno fahatezerana an’i Marta, sady niezaka nampiseho ny fahefana nananany taminy sy tamin’ny hafa.

Saingy tsy nila nanao izany rehetra izany Izy. Fantatrao ve hoe nahoana ? Satria nilamina sy tony ny sainy.

Ireo fotoam-bavaka niarahany tamin’ny Ray sy ny Fiombonany tamin’ny Fanahy Masina dia nanampy Azy handahatra ireo eritreriny, ireo fihetseham-pony sy ireo fahatsapany amin’ny an’Andriamanitra, ka nahatonga Azy tsy hamela ny tsi-filaminana, ny hatezerana na ny tahotra hahazo Azy.

Izany no nahatonga an’i Jesosy namaly am-pitiavana an’i Marta raha tokony ho niaro tena na nahatsiaro voatafika Izy. Hitany fa nitebiteby fotsiny ity vehivavy sarobidy ity ka tsy nahafehy ny fihetseham-pony intsony nanoloana ny fitiavana te hampifaly Azy. 

Rehefa namerina ny anarany indroa Izy dia niteny tamim-patokiana mba hampiseho azy ny tena olany, nanao hoe : “Marta, Marta, maro ahina sy maro herehina hianao…” (Lioka 10:41).

Rehefa maro ireo zavatra ao an-dohantsika sy ao amin’ny lisitry ny zavatra tokony ataontsika, dia mora ho an’ny fanahintsika ny miady saina na mitebiteby (araka ny nolazaintsika omaly).

Ry namako, raha miaina izany ianao dia raiso ny Fahafahana izay omeny anao anio ! Mahalala ny fonao Jesosy ary te hanafaka anao amin’izany fahatsapana izany, mba hiainanao anaty fiadanam-po sy fifaliana noho ny Fanatrehany isan’andro.