😅 Mivonona ianao !

Araka ny nolazaiko taminareo andro vitsivitsy lasa izay, nandritra ny fiarahako tamin’i Jesosy Kristy, dia nahatsapa bebe kokoa hatrany ny maha zava-dehibe ny faharetana eo amin’ny fiainantsika aho.

Efa fantatro hatry ny ela fa ilaina io lohahevitra io, saingy tsy noheveriko hoe tena zava-dehibe izany. Mamelà ahy hanome anao ohatra vitsivitsy, mba ho azonao tsara kokoa :

•  Nandritra ny taona maro izay nampianarako Sekoly Alahady ho an’ny zatovo dia hitako ombieny ombieny fa ny faharetana no fanalahidy tsara indrindra hanohanana azy ireo . Maro tamin’izy ireo no niala tamin’Andriamanitra sy nandray fanapahan-kevitra diso nandritra izany fotoana izany, kanefa ny faharetana no nanampy ahy hahita ny zava-misy marina amin’ny ankapobeny sy hiandry am-paharetana ny asan’Andriamanitra eo amin’ny fiainany, sady maneho azy ireo ny hatsaram-po sy ny fitiavako rehetra. Nanova tanteraka ny fiainan’izy ireo izany.
•  Vao nivady herintaona izahay no nahafantarako fa tsy zakan’ ny vadiko ny fahatezerako diso tafahoatra sy ny fahasorenako. Indraindray aho te hitaraina, na hampianatra azy izay zavatra tokony hataony, nefa tsapako fa izany toetrako izany dia fanehoan-kevitry ny nofoko fotsiny ihany. Ny zavatra ilainy rehefa misy olana dia ny fahatoniako, ny fihainoako am-paharetana , ary ny hitahiako azy amin’ny alalan’ny Tenin’Andriamanitra. Isaky ny nanao izany aho dia tena fitahiana tokoa !

Fanalahidy mahery ny faharetana ! Ary fantatrao ve hoe amin’ny fotoana inona ianao no afaka mitombo indrindra amin’ny faharetana ? Manoloana ny fahoriana, milaza ny Baiboly fa “aoka isika hifaly na amin’ny fahoriana aza, satria fantatsika fa ny fahoriana mahatonga faharetana” ( Romana 5:3).

Eny, ry namako, ny fitsapana dia lalana hahafahantsika mampitombo ny faharetantsika !

Fantatro fa amin’ny fotoana sasany dia mety te hanao zavatra tsy manam-paharetana ianao, te hitaraina, hilaza izay rehetra tonga ao an-tsainao … fa amin’izany fotoana izany indrindra no fanalahidy : raha misafidy ny hamaly am-paharetana ianao amin’izay fotoana izay, dia ho hitanao ny voa sarobidy aterak’Andriamanitra eo amin’ny fiainanao, sy ny fitahiana aterak’izany.

Rehefa tonga ny olana dia miomàna hanam-paharetana ! Izany no zavatra tsara indrindra azonao atao, hijoroako vavolombelona aminao izany satria efa nahazoako traikefa =)