Mbola tsy tapitra !

Efa nahatsapa ve ianao fa tapitra ny zavatra rehetra?

Iray amin’ireo tantara ao amin’ny Baiboly izay manohina ny foko indrindra ny tantaran’i Davida Mpanjaka, rehefa niverina niaraka tamin’ny tafiny izy, avy niady tamin’ny Filistinina. Navelan’izy ireo tany Ziklaga ny vady aman-janaka ary ny fananana rehetra. Raha vao niverina tao an-tanàna anefa izy ireo, dia hitany fa misy zavatra tsy milamina. Azonao sary an-tsaina ve ny horohoron’i Davida sy ny tafiny rehefa nahita ny setroka niakatra teo ambonin’ilay tanàna?

Rehefa tonga tany izy ireo dia hita fa voaroba ny fananana. Fa ambonin’izany rehetra izany dia nisy naka an-keriny sy nogadraina ny vady aman-janany. Ny soratra dia milaza fa ketraka ny rehetra, nitomany ary ny sasany aza dia efa nieritreritra ny hitora-bato an’i Davida noho ny famelany toe-javatra toy izao nitranga. Namoy ny zava-drehetra koa anefa i Davida.

Mety ho izany indrindra ny fiafaran’ity tantara ity, saingy nisy zavatra iray nanova ny zava-drehetra. Milaza ny Baiboly fa « Davida kosa nampahery ny tenany tamin’i Jehovah Andriamaniny. » (1 Samoela 30:6).

Tao anatin’ny famoizam-po tanteraka, dia nitsangana izy, nanatona an’Andriamanitra mba hitady izay tokony ho hataony, ary nandamina ny zava-drehetra ho an’ny tafiny. Noho izany, niainga ny olona, ary taorian’ny andro maromaro nisian’ny fisalasalana, dia hitan’izy ireo ny tafiky ny fahavalo, ary afaka nanafaka ireo fianakaviany sy namerina ny fananana rehetra izy ireo. Fanapahan-kevitra tsara iray monja no nanova tanteraka ny toe-javatra!

Ry namako, tsy mbola tapitra ny tantara. Angamba ianao mandalo toe-javatra toa tsy ahitanao vahaolana intsony? Na, efa niaina ny fahalasan’ny olona akaiky anao ianao, ary tsy fantatrao izay hitranga aminao amin’ny ho avy…

Anio, tsy maintsy mandray fanapahan-kevitra ianao : mitady hery vaovao ao amin’Andriamanitra, mitsangana hanova ny anjaranao. Misy fiafarany tena mahafaly miandry anao.