🤔 Fotoana maro tsy ampoizina no miandry antsika…

Tena faly aho manomboka herinandro vaovao, hiarahana handalina aminao indray ireo harena izay ananan’ny Tenin’Andriamanitra ho an’ny fiainantsika.

Hiaraha-mahalala fa miaina anaty vanim-potoana mampanahy isika. Tsy vitan’ny hoe vao nivoaka tamin’ny areti-mandringana izay tena nanozongozona ny fototry ny fiarahamonina isika, fa ny tsaho momba ny ady lehibe koa dia mihamitombo isan’andro manodidina antsika.

Ankoatra izay, tsy lazaina intsony ny fiainantsika manokana, ny olana lalovantsika, ny zava-mitranga tsy ampoizina ary ny fahasarotan’ny fiainana andavan’andro izay mamely antsika indraindray.

Inona no ataonao manoloana izany rehetra izany? Ahoana no iatrehanao ireo toe-javatra ireo, ary koa ny ahiahy aterak’izany?

Isika rehetra dia samy manana olana izay mandondona eo am-baravaran’ny fiainantsika, ary tsy afa-miala amin’izany isika. Ny fanalahidy dia miankina amin’izay ho ataontsika manoloana izany. Manasa azy ireo ao am-ponao ve ianao, manolotra kafe ary miresadresaka? Avelanao hisokatra ho azy ireo ve ny varavaranao? Sa manapa-kevitra ny hamela azy ireo eo ivelan’ny fonao ianao?

Amin’ity herinandro ity dia tiako isika hamakafaka ny iray amin’ireo andalana izay nisy fiantraikany lehibe teo amin’ny fiainako, ary mbola manohina ahy foana izany isaky ny mamaky azy io aho: “Aza manahy na inona na inona…”.

Misy dikan-teny ara-Baiboly maro, saingy tiako zaraina aminareo ny iray amin’ireo mahafinaritra ahy indrindra, dia izao manaraka izao:

“Aza voasarika amin’ny lalana rehetra ary aza manahy. Ataovy tondraka vavaka isan’andro ny fiainanao, ka apetraho amin’Andriamanitra ny fangatahana feno finoana, amin’ny fankasitrahana lalina. Lazao Aminy ny antsipirian’ny fiainanao rehetra, ary ho hitanao fa ny fiadanan’Andriamanitra izay mihoatra noho ny fahalalan’ ny olombelona rehetra no hanome anao ny valiny tadiavinao ao amin’i Jesosy Kristy.” ( Filipiana 4:6-7)

Eny ry namako, ny fiadanan’Andriamanitra dia mandresy ny fanahiana amin’izao tontolo izao! Mandritra ity herinandro ity dia hibanjina lalindalina kokoa ity fahamarinana ity isika, ary hitarika anao aho mba hahazoanao fandresena tanteraka amin’ny zavatra rehetra, indrindra eo amin’izay mety hanaisotra ny fiadananao.

Ato am-poko manokana ianao.