🎟 Hamarino ny tapakilanao …

Inoako fa efa naheno ity tantara ity ianao saingy hotantaraiko aminao ihany izany =)
Voalaza fa nisy lehilahy iray nahazo tapakilan-tsambo hifindra monina avy any Eoropa ho any Amerika, tamin’ny fiandohan’ny taonjato faha-20. Nampiasa ny tahiriny rehetra tamin’ny fividianana ny tapakila izy ary tsy afaka nisakafo tao amin’ny trano fisakafoanana tao anaty sambo. Noho izany dia nanapaka hevitra izy ny hitondra sakafo anaty boaty sy sakafo tsy mety simba, mba hahafahany misakafo mandritra ny dia.
Ny andro farany talohan’ny nahatongavany tao amin’ny seranan-tsambo, rehefa avy nisakafo kely na nisakafo ratsy nandritra ny 3 herinandro izy, dia nanapa-kevitra ny handeha amin’ity trano fisakafoanana ity mba hisakafo tsara. Tamin’ny fotoana andoavana vola dia nanamarina ny tapakilany ny mpandroso sakafo ary namaly azy nanao hoe : “ Tsy mila mandoa na inona na inona ianao Tompoko. Efa tafiditra anatin’ny vidin’ny tapakilanao ny sakafo.”
Efa nitranga taminao ve izany ? Indraindray isika dia somary mitovy aminy : mionona amin’ny poti-kanina ka manakana ireo sakafo tena tsara izay nomanin’Andriamanitra ho antsika. Ary izany rehetra izany tsy fantatsika akory !
Hoy ny Baiboly : “Ary tamin’ny andro farany, izay andro lehibe tamin’ny andro firavoravoana, dia nitsangana Jesosy ka niantso nanao hoe: Raha misy olona mangetaheta, aoka izy hanatona Ahy ka hisotro” (Jaona 7:37). Tiako hoe tao anatina fety mihitsy no nilazan’I Jesosy izany !
Eny ry namako, Jesosy no hany tokana afaka mamoky anao marina. Efa nandoa ny vidiny Izy mba hahafahanao miaina tanteraka amin’ny fiainana feno ny Fitahiany, amin’ny lafiny rehetra. Efa tafiditra ao anatin’ny tapakilan’ny famonjena nomeny anao izany rehetra izany.
Anio àry, avelao ho vokin’ny Hatsarany ny tenanao.