🤠Lainga 11
Fantatrao ve fa misy fiantraikany amin’ny fahasalamantsika ny lainga?
Araka ny fanadihadiana natao tao amin’ny Oniversiten’i Notre Dame tany Etazonia, dia mandainga in-11 eo ho eo isan-kerinandro ny olona. Rehefa miresaka momba ny lainga aho dia mamaritra fa tafiditra ao anatin’izany ny tsy filazana ny marina na ny famelana ny sasany hino ny fahamarinana amin’ny ampahany.
Rehefa avy nanao fanandramana tamin’ny santionan’ny olona 110 izy ireo dia afaka nanamarika fa ny vondron’olona nanapa-kevitra ny tsy handainga nandritra ny faharetan’ny fianarana dia niatsara ny fahasalamany.
Ny tena nahagaga, tao amin’ireo vondrona afaka mandainga, dia hitan’izy ireo fa ny isan’ny lainga nolazaina dia mifanaraka 100% amin’ny isan’ny olana ara-pahasalamana nambara. Mahavariana !
Ny lainga dia miteraka aretin’andoha, aretin-tenda, adin-tsaina ary alahelo. Ny lainga dia mampitombo ny fitempon’ny fo sy ny tosidra, izay, araka ity lahatsoratra ity, dia mampihena ny isan’ny hery fiarovana ilaina hiadiana amin’ny aretina ao anatin’ny ra.
Nanatsoaka hevitra toy izao ny mpanoratra ilay fandinihana: “Manatsara ny kalitaon’ny fifandraisana ara-tsosialy ny filazana ny marina, ary izany dia lasa manatsara ny kalitaon’ny fiainana indray”.
Izany indrindra no ambaran’ny Salamo faha-34 amintsika manao hoe: “ Dia arovy ny lelanao amin’ny ratsy. Ary ny molotrao mba tsy hiteny fitaka. Halaviro ny ratsy, ka manaova soa: Mitadiava fihavanana, ka araho izany” ( Salamo 34:13-15).
Rehefa mikatsaka ny fahamarinana sy ny hatsaram-panahy ary ny fiadanana isika dia miteraka vokatra tahaka izao:
- Miaina ela kokoa isika.
- Mahafinaritra antsika kokoa ny fiainana.
- Manodidina antsika isan’andro ny fahatsarana.
Amin’izao fotoanan’ny fampielezan-kevitra izao, dia maro no hampiasa sy hanararaotra io teti-dratsin’ny devoly io mba hitaomana olona. Aoka isika hivavaka sy hanana fahatakarana ara-panahy amin’ny famelana ny tenantsika hotarihin’ny Fanahy Masina fa tsy amin’ny zavatra hafa. Fantatrao ve fa ny Baiboly dia milaza fa ny devoly no rain’ny lainga? ( Jaona 8:44 )
Eny, ry namako, esory tsy ho eo amin’ny fiainanao ny lainga. Tsy misy tsara indrindra noho ny milaza ny marina mba hiaina eo ambany fiarovana sy fitahian’Andriamanitra. Anio, hanampy ahy ve ianao mba hiarahantsika manapa-kevitra ny hanaisotra ireo endrika lainga sy ny filazana fahamarinana amin’ny ampahany eo amin’ny fiainantsika? Mivavaka aho mba homen’ny Tompo hery sy fahendrena hanaovana izany ianao.
