🛁 Fotoana fandroana izao !

Ny alina namadihana Azy dia nanasa ny tongotry ny mpianany Jesosy. Azonao sainina ve Jesosy manasa ny tongotrao ?

Rehefa mamaky ny tantara ao amin’ny Filazantsaran’i Jaona isika, dia azoko tsara ny nahatonga an’i Petera niteny tamin’i Jesosy hoe: « Sanatria raha hanasa ny tongotro Hianao » (Jaona 13 :8). Heveriko fa tokony ho isika no manompo sy manasa ny tongotr’i Jesosy fa tsy ny mifanohitra amin’izany!

Kanefa, mba ahafahana manome dia tsy maintsy mianatra mandray aloha isika. Izany no nahatonga an’i Jesosy somary namaly tamin’ny fomba masiaka an’i Petera hoe : « Raha tsy hosasako hianao, dia tsy manana anjara amiko. »(Jaona 13 :8)

Tena ankasitrahan’Andriamanitra ny faniriantsika hanompo Azy. Fa raha te handray avy Aminy isika dia mila mianatra aloha ary mitaky fanetren-tena izany.

Jesosy dia milaza fa tsy maintsy ho tonga tahaka ny zaza isika raha te- hiditra ao amin’ny Fanjakan’ny lanitra (Matio 18 :3). Iray amin’ireo toetra mampiavaka ny ankizy tokoa ny fahalemeny. Fantatr’izy ireo fa miankina tanteraka amin’ny ray aman-dreniny izy ireo, ary noho ny fanetren-tenany, dia hain’izy ireo ny mandray ny zavatra avy amin’ny ray aman-dreniny am-pahatokiana tanteraka.

Ry namako, raiso anio izay rehetra nomanin’Andriamanitra ho anao. Avelao Izy hanompo anao amin’ny fitiavana, aoka Izy hanadio anao sy hitari-dalana anao, tahaka ny fahatokian’ny zaza eo an-trotroan-drainy. Tena tia anao izy! Ary tena miankina Aminy isika!

Eny, anio, aoka ny fitiavan’Andriamanitra hameno anao ary zarao amin’ny hafa izany. Mba hifanasa tongotra sy hifanompo amin’ny manodidina koa izaho sy ianao ankehitriny, araka ny efa niantsony antsika. (Jaona 13 :14)