😘📱Nanao “selfie” ve ianao?

Moa ve ianao miasa saina amin’ny fisehoana ivelany sy izay mety holazain’ny hafa? Amin’ny lafiny iray isika rehetra dia samy mitady, mba ho eken’ny olona manodidina antsika.
Toa hita mihamitombo hatrany ny fisehoana ivelany eto amin’ity izao tontolo izao ity. Maro ny olona, ​​na dia mijaly aza izy ao anatiny ao, dia afaka maka “selfie” amin’ny tsikiny izay tsara indrindra ary mametraka izany amin’ny tambazotran-tserasera mba ho hita fa milamina tsara ny zava-drehetra… Efa nanao an’izany ve ianao?
I Saoly no mpanjakan’ny Israely voalohany. Na ny bika aman’endriny na ny hatsarany dia niavaka. Izy no lehibe indrindra tamin’ny vahoaka, nofidin’Andriamanitra, nohosoran’i Samoela mpaminany, ary efa naminany mihitsy aza. Natahotra izay holazain’ny olona momba azy anefa i Saoly, ka nahatonga azy handray fanapahan-kevitra ratsy. Indray andro, rehefa tsy maintsy niatrika fifanandrinana sarotra tamin’ilay mpaminany izy, dia tsy afaka nanao inona hafa tsy ny namaly azy hoe: “… Efa nanota aho izao, kanefa, masìna hianao, mba omeo voninahitra eo anatrehan’ny loholoko sy eo anatrehan’ny Isiraely aho.” ( 1 Samoela 15:30). Nohajambain’ny tahotra sy ny bika aman’endriny ny fony ka namoy ny anjarany efa voaomana ho azy. Maty resy sy nampijaliana izy, lavitry ny fikasan’Andriamanitra ho azy.
Ry namako, ny tahotra sy ny fisehoana ivelany dia afaka manimba ny anjara efa nomanin’Andriamanitra ho anao. Anio, aoka ny masonao hifantoka amin’Ilay tena zava-dehibe: Andriamanitra; ary amin’ny alalany no hahafantaranareo ny zavatra rehetra.
Te hiara-hivavaka amiko ve ianao? “Tompo ô, ampio aho mba tsy hanahy loatra ny amin’izay lazain’ny hafa momba ahy. Ampio aho hiatrika ny tahotra ny olako, ary tariho tsy hiankina afa-tsy amin’izay lazainao amiko. Apetrako Aminao ny fitokiako Tompo ô, Ianao no laharam-pahamehana. Misaotra Anao fa ao Aminao dia foana ny tahotra sy ny tsy fandriampahalemana! Amin’ny anaran’i Jesosy. Amen!”