Inona no bitsihan’Andriamanitra aminao androany? 🙌🏻
Miteny amintsika amin’ny fomba maro sy amin’ny fotoana samihafa eo amin’ny fiainantsika andavanandro Andriamanitra. Hatramin’ny niandohan’ny fiainako amin’ny maha-kristiana dia efa niresaka tamiko Andriamanitra tamin’ny alalan’ny eritreritra, nofy, fofona, fihetseham-po, sns.
Vao haingana aho no nandre ny fijoroana vavolombelona nataon’ny vehivavy iray niantsena tao amin’ny toeram-pivarotana lehibe. Indray mandeha, dia nahatsikaritra tovolahy iray teo akaikiny izy, ary tonga tao an-tsainy ny eritreritra avy amin’Andriamanitra fa manana olana amin’ny sorony havanana io zazalahy io. Noheveriny fa eritreriny ihany izany, dia tsy norarahiany, gaga izy anefa satria nanomboka nanetsika ny sorony havanana ity lehilahy ity, niaraka tamin’ny fihetsika naneho ny fanaintainany! Resy lahatra izy ary nahatsapa fiadanana tao am-pony, ka izany no nahazony toky nahafahany nanatona ilay tovolahy. Nohazavainy taminy fotsiny ny zava-nitranga ary nanontany azy izy raha afaka mivavaka ho an’ny sorony. Nahakasika ny fon’izy ireo tamin’io andro io ny zavatra niainany.
Matetika Andriamanitra no miresaka amintsika amin’ny alalan’ny zavatra bitika, izay toa tsy misy dikany amintsika. Ao amin’ny Baiboly, i Elia mpaminany dia nandeha tany an’efitra nandositra mba ho velona. Tao no nanehoan’Andriamanitra ny heriny tamin’ny fomba samihafa: rivotra mahery, horohoron-tany ary afo. “Ary manarakaraka ny horohoron-tany nisy afo; nefa Jehovah tsy tao amin’ny afo; ary manarakaraka ny afo nisy feo nitsoka malemy. Ary raha ren’i Elia izany, dia nosaronany ny kapĂ´tiny ny tavany, ary nivoaka izy ka nijanona teo am-bava-zohy.” ( 1Mpanjaka 19:12-13 ).
Tamin’io tsio-drivotra malefaka io, sy io feo malefaka io, no voakasika ny fon’i Elia ary afaka niresaka taminy Andriamanitra. Eny, mibitsika an-tsofintsika Andriamanitra izay azony lazaina amin’ny feo mafy! Ary ny teniny dia balsama manasitrana mahery ho an’ny fanahintsika.
Ry namako, inona izao no bitsik’Andriamanitra ao an-tsofinao? Inona no lazainy aminao ao am-ponao lalina ao? Mamporisika anao aho mba hanokana fotoana isan’andro hihainoana an’io bitsika malefaka io. Eny, maniry ny hikasika ny fiainanao sy hanavao anao Andriamanitra anio.
Tahiana manokana ianao!
