Meteza ho vavolombelon’ny fahagagany

Manantena aho fa nahafinaritra ny tontolo andronao omaly, ary ny fanirianao rehetra izay iantsoan’Andriamanitra anao hiainana dia mirehitra be dia be kokoa, ao anatinao.
Hoy ny tapany voalohany amin’ilay andalan-teny nojerentsika omaly: “ Koa amin’izany, satria misy vavolombelona maro be toy izany manodidina antsika toy ny rahona,…” ( Hebreo 12:1).
Tsara ny manamarika fa ny fiandohan’ity toko ity dia manomboka amin’ny teny, izay maneho ny tohiny sy vokatry ny fanazavana tao amin’ny toko teo aloha.
Eny, ny toko teo aloha dia ilay toko malaza ao amin’ny Hebreo 11, izay miresaka momba ny mahery fo amin’ny finoana.
Ao amin’io toko io, ny mpanoratra dia miresaka momba ny zava-bita izay nataon’Andriamanitra teo amin’ny fiainan’ny olona toa an’i Abrahama, Mosesy, Elia, sy ny maro hafa, izay ohatry ny finoana sy ny fanompoana an’Andriamanitra.
Nanapa-kevitra ny hanara-dia an’Andriamanitra izy ireo rehefa toa nanohitra azy ny zava-drehetra. Ary, vokatry ny finoany, dia samy niaina fahagagana sy asan’Andriamanitra mahatalanjona teo amin’ny fiainany izy ireo.
Io “koa” io dia mampifandray antsika sy izy ireo. Eny, izy ireo dia vavolombelon’ny herin’Andriamanitra sy ny fitiavany. Ary izy ireo koa dia vavolombelon’ny zavatra tian’Andriamanitra sy afaka ataony eo amin’ny fiainantsika.
Ry namako, raha niaraka tamin’ireo mahery fo tamin’ny finoana Andriamanitra taloha, dia momba anao koa Izy! Ilay Andriamanitra izay nanao fahagagana teo amin’ny fiainan’izy ireo ihany no te-hanao zavatra ho anao!

• Tiany hosokafana ny Ranomasina Mena rehetra izay misakana anao tsy handroso.
• Tena tiany ny ho vatsy ho anao.
• Te hanala ny haizina izay manohitra anao Izy.
  Mitsangàna anio amin’ny finoana ny Anaran’i Jesosy, ary tsarovy fa mahery fo amin’ny finoana ianao. Miantso anao ho tonga toy izany Andriamanitra!
  Mahatsiaro anao aho ary mitondra anao ambavaka