Tapaka ny jiro!

Noho ny antony maro samihafa dia miverimberina foana izany toe-javatra izany eto Madagasikara amin’izao vaninandro izao… Fahatapahan-jiro mety maharitra ora maro na andro maromaro ho an’ny sasany.
Saingy mahafantatra olona “mamirapiratra” ve ianao? Ireo karazan’olona izay manana hazavana eo amin’ny fiainany, zavatra izay mampiavaka azy ireo.
Ny olona mamiratra rehetra fantatro dia manana toetra iraisana samy manana fitiavana miavaka izy ireo izay porofoiny amin’ny zavatra ataony.
Eny, mampamiratra antsika ny fitiavana. Hoy ny baiboly manambara hoe: “Izay milaza fa ao amin’ny mazava izy, kanefa mankahala ny rahalahiny, dia mbola ao amin’ny maizina ihany. Izay tia ny rahalahiny no mitoetra ao amin’ny mazava, ka tsy misy fahatafintohinana ao aminy.” (1 Jaona 2:9-10)
Ny fitiavana dia toy ny herinaratra ao an-trano : raha tapaka ny jiro dia maizina avokoa ny zavatra rehetra fa rehefa mandeha indray ny jiro dia tonga ny hazavana. Ry namako, rehefa mamiratra eo amin’ny fiainanao ny fitiavana dia mamirapiratra ny fiainanao manontolo!

Io fitiavana io dia mitoetra ao anatinao, ary vonona ny hanazava ny fiainanao manontolo sy hanazava ny hafa. Te hivavaka ve ianao?
“Tompo ô, mangataka aminao aho mba hameno ny fitiavanao ahy. Enga anie ny fiainako manontolo ho feno ny Fanatrehanao, ka tsy afaka ny tsy hitia ny olona manodidina ahy aho. Avelao ny fiainako mba hamirapiratanao amin-kery ary ho fitahiana lehibe ho an’ny izay mihaona amiko anio. Misaotra ny amin’ny Fitiavanao! Amin’ny anaran’i Jesosy. Amen”

Tohizo hatrany ny famirapiratanao ry namako. Na inona na inona zavatra lalovanao ankehitriny, ny fahazavana ao anatinao dia tsy handalo “delestazy” izany ary ny manodidina anao dia tena mila izany fahazavanao izany ankehitriny.